જાપાનની સ્પેસ એજન્સી JAXAએ સોમવારે કહ્યું કે તેના SLIM અવકાશયાન ચંદ્ર પર ઉતર્યાના એક અઠવાડિયાથી વધુ સમય બંધ રહ્યાં બાદ આખરે કામ કરવાનું શરૂ કરી દીધું છે. સોલાર પેનલ્સની ખોટી દિશાને કારણે જાપાનના ચંદ્રયાનની શક્તિ બંધ થઈ ગઈ હતી.
જાપાનની સ્પેસ એજન્સી JAXAના પ્રવક્તાએ કહ્યું કે તેઓએ રવિવારે મોડી રાત્રે ચંદ્રની તપાસ માટે તેમના સ્માર્ટ લેન્ડર સાથે સંપર્ક કર્યો હતો.
20 જાન્યુઆરીએ ચંદ્ર પર ઉતર્યાના નવ દિવસ બાદ જાપાને પોતાના ચંદ્રયાન સાથે સંપર્ક સ્થાપિત કર્યો છે. ચંદ્ર પર અવકાશયાન લેન્ડ કરનાર જાપાન પાંચમો દેશ બની ગયો છે.
લેન્ડરની સોલાર પેનલે કેવી રીતે કામ કરવાનું શરૂ કર્યું તેના પર જાપાનની સ્પેસ એજન્સીએ કહ્યું કે એવું લાગે છે કે સૂર્યની દિશા બદલાવાને કારણે લેન્ડરની સોલાર પેનલ પર પ્રકાશ પડ્યો અને તેનાથી વીજળી ઉત્પન્ન થઈ. જેના કારણે 9 દિવસ સુધી ચંદ્રની સપાટી પર પડેલું આ લેન્ડર ફરી ‘જીવંત’ થઈ ગયું. ત્યારબાદ લેન્ડરે ચંદ્ર વિશે વધુ જાણવાના પ્રયાસમાં ચંદ્રની સપાટી પર ઓલિવિન ખડકોની રચનાની તપાસ કરવા માટે તેના મલ્ટી-બેન્ડ સ્પેક્ટ્રલ કેમેરા વડે ફોટા લેવાનું શરૂ કર્યું.
20 જાન્યુઆરીના રોજ, જાપાનનું મૂન લેન્ડર ચંદ્ર વિષુવવૃત્ત નજીકના ખાડામાં ઉતર્યું હતું, જે તેની નક્કી કરાયેલી લેન્ડિંગ સાઇટથી 55 મીટર દૂર હતું. જાપાની એજન્સી અનુસાર, તેમના મિશનને પિન પોઈન્ટ લેન્ડિંગમાં સફળતા મળી. આ એક એવી ટેક્નોલોજી છે જે ભવિષ્યમાં ચંદ્ર પરના ધ્રુવોના સંશોધન માટે મોટી સંભાવના ધરાવે છે. તેઓ ઓક્સિજન, બળતણ અને પાણીના સંભવિત સંસાધનો ધરાવે છે તેવું માનવામાં આવે છે. જો કે, ચંદ્રની સપાટી પર ઉતર્યાના થોડા સમય પહેલા, લેન્ડરના બે મુખ્ય એન્જિનોમાંથી એક બંધ થઈ ગયું, જેના કારણે તે લક્ષ્યથી થોડા ડઝન મીટર દૂર રહી ગયું.
લેન્ડરની સોલાર પેનલ પશ્ચિમ તરફ હતી અને સૂર્યપ્રકાશના અભાવે તરત જ વીજળી ઉત્પન્ન કરી શકતી ન હતી. સ્પેસ એજન્સીએ ટચડાઉનના 2 કલાક અને 37 મિનિટ પછી SLIMની ખતમ થઈ ગયેલી બેટરીઓને મેન્યુઅલી અનપ્લગ કરી. હવે સોલાર પેનલ કાર્યરત થયા બાદ તેણે કામ કરવાનું શરૂ કરી દીધું છે. સ્પેસ એજન્સીએ તેના લેન્ડરને લઈને કોઈ તારીખ આપી નથી કે તે ચંદ્ર પર તેનું ઓપરેશન ક્યારે પૂર્ણ કરશે.