ઉત્તરાયણ પર પતંગના રસિયાઓ માટે ઊંધિયા અને જલેબી સાથે ઉત્સવની મજા બમણી થઈ જતી હોય છે, આવામાં આજે રાજ્યમાં ઠેર-ઠેર વિવિધ પ્રકારના ઊંધિયાનું વેચાણ થઈ રહ્યું છે. ઉત્તરાયણ પર આખો પરિવાર ધાબા પર હોય એવામાં રસોડામાં ઘણાં પરિવારો રજા રાખતા હોય છે અથવા તો અગાઉથી તેની તૈયારીઓ કરી લેતા હોય છે. આવામાં કેટલાક પરિવારો બજારમાંથી જ પોતાની પસંદનું ઊંધિયું ખરીદીને તેને લિજ્જત માણતા હોય છે.
કહેવાય છે કે ‘જ્યાં જ્યાં વસે એક ગુજરાતી ત્યાં ત્યાં સદાકાળ ગુજરાત’ આવામાં વિદેશમાં રહેતા ગુજરાતીઓ પણ વિવિધ તહેવારોની ઉજવણી કરતા હોય છે. આજે અહીં કેનેડાની વાત કરવાની છે કે જ્યાં મોટી સંખ્યામાં ગુજરાતીઓ રહે છે જેમાં પરિવારો સિવાય ગુજરાતી વિદ્યાર્થીઓની સંખ્યા પણ વિશાળ છે. જેઓ પણ ઉત્તરાયણ જેવા તહેવારની ઉજવણી કેનેડામાં કરે છે.
કેનેડામાં રહેતા વિદ્યાર્થીઓ અને પરિવારો પોતાના હાથ ખર્ચ કાઢવા માટે નોકરી-ધંધા કરતા હોય છે. વિદ્યાર્થીઓ ભણવાની સાથે હોટલ, રેસ્ટોરન્ટ, વિવિધ કંપનીઓ અને ફૂડ ચેઈનમાં તથા સ્ટોરમાં નોકરી કરતા હોય છે. આવામાં ગુજરાતીઓ ઉત્સવમાં પણ પોતાનો વ્યવસાય ચલાવતા હોય છે. જેમાં એક ગુજરાતી ઊંધિયું વેચી રહ્યા છે. માનસી દવે નામના યુઝરે સોશિયલ મીડિયા પર ટેસ્ટી ઊંધિયાના મેનૂ સાથે જાહેરાત પોસ્ટ કરી છે.
માનસિએ કરેલી જાહેરાતમાં ઘણાં યુઝર્સ કે જેમણે અગાઉ ઊંધિયાનો ટેસ્ટ માણ્યો છે તેઓ તેમના વખાણ કરી રહ્યા છે તો ઘણાં યુઝર્સ તેમના ઊંધિયાનો ટેસ્ટ માણવા માટે ઉત્સુકતા દર્શાવી છે.
મમાઝ કિચનના નામથી ઉત્તરાયણ સ્પેશિયલ મેનૂ તૈયાર કરવામાં આવ્યું છે તેના પર નજર કરીએ તો સૌથી પહેલા ઊંધિયું-પુરી કોમ્બો છે જેમાં ઊંધિયું, 5 પુરી, ફરસાણ અને મીઠાઈ પિરસવામાં આવે છે જેની કિંમત તેમણે 15 કેનેડિયન ડૉલર (લગભગ 900 રૂપિયા) રાખી છે. જો કોઈને માત્ર ઊંધિયાનો ટેસ્ટ કરવો હોય તો તેની કિંમત 12 ડૉલર રાખવામાં આવી છે. જોકે, માત્ર ઊંધિયું ખરીદવા માગતા હોય તેમણે 15 લોકો કે તેનાથી વધુનો ઓર્ડર આપવો પડે છે.